சின்னத்திரையில் நடித்தாலும் சில நடிகர்கள் மட்டுமே ரசிகர்களின் அன்பை உணர்வுப்பூர்வமாக பெறுவார்கள். அந்தவகையில், ‘பிக் பாஸ் சீசன்8’ நிகழ்ச்சியின் மூலம் ரசிகர்கள் மத்தியில் பிரபலமாகி வெகு விரைவில் அன்பை பெற்றவர் நடிகர் ராணவ்.
இந்த பிரபல்யமும் திறமையும் அவரை பல புதிய படங்களுக்கு இயக்குநர்கள் மற்றும் தயாரிப்பாளர்களின் தேர்வாக மாற்றியது. அந்த வகையில், காந்தி கிருஷ்ணா இயக்கத்தில், ரொமாண்டிக் ஜானரில் உருவாகியுள்ள ‘பிரேக்ஃபாஸ்ட்’ படத்தில் கதாநாயகனாக அறிமுகமாகிறார். ஏப்ரல் 24 அன்று உலகம் முழுவதும் திரையரங்குகளில் இந்தப் படம் வெளியாகிறது.
இந்தப் படத்தில் நடித்த அனுபவம் குறித்து ராணவ் பகிர்ந்து கொண்டதாவது, “காந்தி கிருஷ்ணா சாரின் இயக்கத்தில் அறிமுகமாவது எனக்கு கனவு நனவான தருணம். தமிழ் சினிமாவில் அவரது பயணம் இன்ஸ்பயரிங்கானது மட்டுமல்ல, மனித உணர்வுகளை கொண்டாடும்படியான படங்களையும் அவர் கொடுத்திருக்கிறார். குறிப்பிட்ட இடைவெளிக்கு பிறகு அவருடைய படம் வெளியாகிறது. அதில் நான் கதாநாயகன் என்பது எனக்கு இன்னுமே ஸ்பெஷல். உறவுகளில் உள்ள உண்மை மற்றும் நுட்பத்தை பேசிய வகையில் ‘செல்லமே’, ‘ஆனந்த தாண்டவம்’ படங்கள் எனக்கு மிகவும் பிடித்தமானது. காதல், உண்மை, குழப்பம் மற்றும் சுயம் அறிதல் என் பல உணர்வுப்பூர்வமான அடுக்குகளை ‘பிரேக்ஃபாஸ்ட்’ படத்தில் வெளிப்படுத்தியிருக்கிறேன். உறவுகளுக்கு இடையேயான அமைதியை வார்த்தைகளை தாண்டி புரிந்து கொள்ளும் கதாபாத்திரம் என்னுடையது.
நவீன யுகத்தில் உறவுகளுக்கு இடையேயான சிக்கல், எதிர்பார்ப்பு, உணர்வு ரீதியிலான இடைவெளி மற்றும் வெளிப்படுத்த இயலாத உணர்வுகள் என பலவற்றை படம் பேசியிருக்கிறது. பார்வையாளர்களின் உணர்வுகளையும் அனுபவங்களையும் இந்தக் கதை திரையில் பிரபதிபலிப்பதால் நிச்சயம் அவர்களும் இந்தக் கதையில் தங்களை பொருத்தி பார்த்துக் கொள்வார்கள். இது வெறும் படம் மட்டுமல்ல, உணர்வுப்பூர்வமான பயணம்” என்றார்.
நடிகர்கள்: ரோஸ்மின், சம்பத் குமார், கஸ்தூரி, கிருத்திக் மோகன், அமிதா ரங்கநாத் மற்றும் பலர்.
தொழில்நுட்பக்குழு விவரம்:
தயாரிப்பாளர்: கிரிஜா வரதராஜ்,
இயக்குநர்: காந்தி கிருஷ்ணா,
இசை: ஜி.வி. பிரகாஷ் குமார்,
பாடல் வரிகள்: வைரமுத்து மற்றும் விவேக்,
தமிழ்நாடு திரையரங்க விநியோகஸ்தர்: குகன்
