RMV – THE KINGMAKER என்ற தமிழ் டாக்குமெண்டரி திரைப்படம், தமிழக அரசியலில் முக்கியமான ஆளுமையாக திகழ்ந்த ஆர்.எம். வீரப்பன் அவர்களின் வாழ்க்கை மற்றும் அரசியல் பயணத்தை விரிவாக பதிவு செய்கிறது. பத்திரிகையாளர் முன்னோட்டக் காட்சியில், தயாரிப்பாளரும் ஆர்.எம். வீரப்பன் அவர்களின் மகனுமான திரு. தங்கராஜ் வீரப்பன் மற்றும் இயக்குநர் பினு சுப்ரமணியம் கலந்து கொண்டு, இந்த ஆவணப்படம் எவ்வாறு உருவானது மற்றும் அதன் நோக்கம் என்ன என்பதைக் குறித்து விளக்கினர்.
இந்த டாக்குமெண்டரி, ஆர்.எம். வீரப்பன் அவர்களின் முழு வாழ்க்கைப் பயணத்தையும், அவர் எவ்வாறு தமிழக அரசியலில் புகழ்பெற்ற ஆளுமையாக வளர்ந்தார் என்பதையும் எடுத்துரைக்கிறது. பல அரசியல் தலைவர்கள், திரைப்படத் துறையினர், பேராசிரியர்கள் மற்றும் பத்திரிகையாளர்கள் தங்களுடைய அனுபவங்களையும், அவருடன் இணைந்து பயணித்த நினைவுகளையும் பகிர்ந்துள்ளனர். குறிப்பாக செங்கோட்டையன் அவர்கள், ஆர்.எம். வீரப்பன் அவர்களின் அரசியல் பங்களிப்புகளை விரிவாக எடுத்துரைக்கிறார்; இதுபோலவே மற்ற அரசியல் தலைவர்களும் அவரது செல்வாக்கைப் பற்றி பேசுகின்றனர்.
மேலும், எம்.ஜி.ஆர் மற்றும் ஜெ. ஜெயலலிதா அவர்களின் அரசியல் வாழ்க்கையில் ஆர்.எம். வீரப்பன் வழங்கிய முக்கிய ஆதரவு இந்தப் படத்தில் குறிப்பிடப்பட்டுள்ளது. 1977 முதல் 1996 வரை ஐந்து அரசுகளில் அமைச்சராக பணியாற்றியதுடன், சட்டமன்ற கவுன்சிலிலும் சட்டமன்றத்திலும் முக்கிய பொறுப்புகளை வகித்தார். 97 வயது வரை வாழ்ந்த அவர், DMK, AIADMK, MGR கழகம் ஆகிய அரசியல் கட்சிகளுடன் தொடர்பு கொண்டிருந்தார். இளம் தலைமுறையினர் அவரது வாழ்க்கை வரலாற்றை அறிந்து கொள்ள உதவும் வகையில் இந்த டாக்குமெண்டரி அமைந்துள்ளதாக, இறுதியில் அவரது மகன் உரையாற்றி நிறைவு செய்கிறார்.
