கேரளாவின் ஒரு சிறிய கிராமத்தைச் சேர்ந்த இந்த சிறுவர்களுக்கு கால்பந்து என்பது வெறும் விளையாட்டு மட்டுமல்ல; அது அவர்களின் passion, கனவு மற்றும் வாழ்க்கையின் ஒரு பகுதியாகவே இருக்கிறது. அந்த உணர்வை அழகாகப் பதிவு செய்கிறது 7 Star Boys திரைப்படம். 14 வயதுக்குட்பட்ட திறமையான ஏழு சிறுவர்கள், உள்ளூர் கால்பந்து போட்டிகளில் பங்கேற்று, தங்களின் திறமையாலும் கடின உழைப்பாலும் தங்களை நிரூபிக்க முயற்சிப்பதே படத்தின் மையக்கரு.
நிகில் பிரேம் ராஜ் இயக்கத்தில் உருவாகியுள்ள இப்படம், கனவுகள், சவால்கள் மற்றும் தடைகளைத் தாண்டி முன்னேற வேண்டும் என்ற விடாமுயற்சியை மையமாகக் கொண்ட சுவாரஸ்யமான திரைக்கதையைக் கொண்டுள்ளது. இளம் திறமைகள் பல்வேறு பிரச்சினைகளை எதிர்கொள்ளும்போது, அவர்களுக்கு யார் துணையாக இருப்பார்கள்? அவர்களின் கனவுகளை நனவாக்க யார் வழிகாட்டுவார்கள்? என்ற முக்கியமான கேள்வியையும் படம் முன்வைக்கிறது. அதற்கான பதிலை உணர்வுப்பூர்வமான கதாபாத்திரங்கள் மற்றும் அவர்களின் பயணத்தின் மூலம் அழகாகச் சொல்கிறது.
படத்தின் மிகப்பெரிய பலமாக அமைவது கால்பந்து போட்டிக் காட்சிகள்தான். முன்னாள் இந்திய கால்பந்து வீரரும் பயிற்சியாளருமான ஐ.எம். விஜயன் படத்தில் இடம்பெற்றிருப்பது போட்டிக் காட்சிகளுக்கு கூடுதல் நம்பகத்தன்மையை அளிக்கிறது. உண்மையான கால்பந்து போட்டியைப் பார்ப்பது போன்ற பரபரப்பையும் உற்சாகத்தையும் இந்தக் காட்சிகள் ஏற்படுத்துகின்றன. குறிப்பாக இரண்டாம் பாதி விறுவிறுப்பாக நகர்ந்து, ஒவ்வொரு ஆட்டத்திலும் என்ன நடக்கப்போகிறது என்ற எதிர்பார்ப்பை ரசிகர்களிடம் தொடர்ந்து ஏற்படுத்துகிறது.
சிறுவர்களாக நடித்திருக்கும் அனைவரும் சிறப்பான நடிப்பை வழங்கியுள்ளனர். குறிப்பாக கதாநாயகனாக நடித்திருக்கும் தனிஷ், ஒரு இளம் கால்பந்து வீரனின் கனவு, தன்னம்பிக்கை, அப்பாவித்தனம் மற்றும் விடாமுயற்சியை இயல்பாக வெளிப்படுத்தியுள்ளார். லுக்மான் அவரான், பாலு வர்கீஸ், அமல் உள்ளிட்ட மற்ற நடிகர்களும் சிறுவர்களின் கதாபாத்திரங்களுக்கு நல்ல துணையாக அமைந்துள்ளனர்.
சிறுவர்களை ஊக்குவித்து, அவர்களின் கால்பந்து கனவுகளுக்கு உறுதுணையாக இருக்கும் இளைஞராக ஆண்டனி வர்கீஸ் தனது துடிப்பான நடிப்பால் கவனம் ஈர்க்கிறார். அவரது கதாபாத்திரம் படத்திற்கு கூடுதல் உற்சாகத்தையும் ரசனையையும் கொடுக்கிறது. அதேபோல், படத்தில் இடம்பெறும் சிறிய காதல் பகுதியும் கதைக்கு ஒரு இனிமையான உணர்வைச் சேர்க்கிறது. ஜுமானா அப்துர் ரஹ்மான் தனது இயல்பான நடிப்பால் அந்தப் பகுதியை அழகாகக் கொண்டு செல்கிறார்.
தொழில்நுட்ப ரீதியாகவும் படம் சிறப்பாக அமைந்துள்ளது. ஜேக்ஸ் பிஜாய் இசையும், ஹிஷாம் அப்துல் வஹாபின் பாடல்களும் படத்தின் உணர்வுக்கும் வேகத்துக்கும் கூடுதல் பலம் சேர்க்கின்றன. குறிப்பாக கால்பந்து போட்டிகளின் போது வரும் பின்னணி இசை காட்சிகளின் பரபரப்பை மேலும் அதிகரிக்கிறது. ஃபயஸ் சித்திக்கின் ஒளிப்பதிவு கிராமத்தின் இயற்கை அழகு, பசுமை, மைதானம் மற்றும் அங்குள்ள விளையாட்டு சூழலை அழகாகக் காட்சிப்படுத்துகிறது.
தேவையற்ற வன்முறை, சாதி சார்ந்த கருத்துகள் அல்லது அதிகப்படியான வணிக அம்சங்கள் என எதற்கும் முக்கியத்துவம் கொடுக்காமல், கால்பந்து, நட்பு மற்றும் கனவுகளை மையமாக வைத்து பயணிக்கிறது 7 Star Boys. குடும்பத்துடன் ரசித்துப் பார்க்கக்கூடிய, புத்துணர்ச்சியூட்டும் மற்றும் ஊக்கமளிக்கும் திரைப்படமாக இது அமைந்துள்ளது. குறிப்பாக கால்பந்தை நேசிப்பவர்களுக்கும், தங்களின் கனவுகளை நோக்கி பயணிக்கும் இளம் தலைமுறையினருக்கும் இந்தப் படம் நிச்சயம் ஒரு நல்ல அனுபவமாக இருக்கும்.
Ratings – 3.6/5
