விபத்தில் கணவரை இழந்த ஒரு பெண், துபாயிலிருந்து தனது மகள் லக்கி (ஸ்ரிஷ்டி) மற்றும் மகன் ஹிருதய் (நிரவ்) ஆகியோருடன் வாழ்வதற்காக வருகிறார். தாய்க்கும் மகளுக்கும் இடையே அடிக்கடி கருத்து வேறுபாடுகளும் சண்டைகளும் ஏற்படுகின்றன. இந்நிலையில், ஒருநாள் லக்கி தனது தம்பியை அழைத்துக்கொண்டு ஐஸ்கிரீம் கடைக்குச் செல்கிறார். அப்போது எதிர்பாராத விதமாக சிறுவன் காணாமல் போகிறான். இதனால் அதிர்ச்சியடையும் தாயும் மகளும் காவல்துறையை அணுகுகின்றனர். போலீஸாரும் உடனடியாக வழக்குப் பதிவு செய்து சிறுவனைத் தேடும் பணியில் இறங்குகின்றனர்.
இந்தத் தேடுதல் வேட்டையில், கேரளாவில் உள்ள ஏரியில் மூழ்கியிருந்த ஒரு காருக்குள் சிறுவனின் சடலம் கண்டுபிடிக்கப்படுகிறது. இந்த வழக்கை இன்ஸ்பெக்டர் சந்துரு (அர்ஜுன் தாஸ்) விசாரிக்கத் தொடங்குகிறார். கிடைக்கும் ஒவ்வொரு தடயத்தையும் வைத்து விசாரணையை முன்னெடுக்கும் அவர், இந்தச் சம்பவத்திற்கும் தமிழ்நாட்டிற்கும் ஏதோ ஒரு தொடர்பு இருப்பதை உணர்கிறார். இதையடுத்து உண்மையைக் கண்டுபிடிக்கும் நோக்கத்தில் தமிழ்நாட்டிற்குப் பயணிக்கிறார். அடுத்தடுத்து வெளிவரும் மர்மங்களும், எதிர்பாராத திருப்பங்களும் படத்தின் மீதான ஆர்வத்தை அதிகரிக்கின்றன. இறுதியில் காணாமல் போன சிறுவனுக்கும் காருக்குள் கண்டெடுக்கப்பட்ட சிறுவனுக்கும் இடையிலான தொடர்பு என்ன என்பது பரபரப்பான கிளைமாக்ஸில் தெரியவருகிறது.
இந்தப் படத்தின் மூலம் கதாநாயகனாக தனது பயணத்தில் மற்றொரு முக்கியமான படியை எட்டியிருக்கிறார் அர்ஜுன் தாஸ். இன்ஸ்பெக்டர் சந்துரு கதாபாத்திரத்தில் தனது வழக்கமான கம்பீரத்தையும் நடிப்புத் திறனையும் வெளிப்படுத்தியிருக்கிறார். அவரது வசன உச்சரிப்பு, தனித்துவமான குரல் மற்றும் திரையில் தோன்றும் விதம் என அனைத்தும் கதாபாத்திரத்திற்கு வலு சேர்க்கின்றன. குறிப்பாக, பாலத்திலிருந்து ஏரிக்குள் குதிக்கும் காட்சியில் எந்தவிதமான டூப் இல்லாமல் அவரே நடித்திருப்பது பாராட்டுக்குரியது. அந்தக் காட்சி அவரது அர்ப்பணிப்பையும் துணிச்சலையும் வெளிப்படுத்துகிறது.
அர்ஜுன் தாஸ் என்றாலே அவரது குரலும், தனித்துவமான உடல்மொழியும், திரையில் அவர் ஏற்படுத்தும் தாக்கமும் தனி அடையாளமாக இருக்கின்றன. ஒவ்வொரு காட்சியிலும் தனது நடிப்பால் பார்வையாளர்களைக் கவர்கிறார். குறிப்பாக, அவரது கம்பீரமான தோற்றமும் வசன உச்சரிப்பும் படத்திற்கு கூடுதல் பலம். JohnDoe திரைப்படம் அர்ஜுன் தாஸின் தனித்துவமான நடிப்பையும் திரை ஆளுமையையும் அழுத்தமாக வெளிப்படுத்துகிறது.
காவல்துறை அதிகாரியாக நடித்துள்ள சஞ்சனா நடராஜனும் தனது கதாபாத்திரத்திற்கு நியாயம் செய்திருக்கிறார். விசாரணை நடத்தும் விதம், கேள்விகளைக் கேட்கும் பாணி மற்றும் அதிகாரத்துடன் செயல்படும் காட்சிகள் அனைத்தும் இயல்பாக அமைந்துள்ளன. அவரது நடிப்பு படத்தின் விசாரணைப் பகுதிகளுக்கு நம்பகத்தன்மையைச் சேர்க்கிறது.
ஸ்ரிஷ்டியின் நடிப்பும் படத்தில் குறிப்பிடத்தக்கதாக உள்ளது. தாயுடன் அடிக்கடி சண்டையிடும் மகளாக வரும் அவர், கதையின் போக்கில் தாயின் அன்பையும் அக்கறையையும் புரிந்துகொள்ளும் விதம் உணர்வுபூர்வமாக அமைந்துள்ளது. தாய்க்கும் மகளுக்கும் இடையிலான உறவில் ஏற்படும் மாற்றங்கள் கதைக்கு நல்ல உணர்ச்சிகரமான பரிமாணத்தை வழங்குகின்றன.
இயக்குநர் மதுமிதா, விறுவிறுப்பான திரைக்கதையுடன் ஒரு சஸ்பென்ஸ் த்ரில்லர் படத்தை உருவாக்கியிருப்பதற்குப் பாராட்டுகள். மர்மம், விசாரணை, எதிர்பாராத திருப்பங்கள் எனப் படத்தை சுவாரஸ்யமாகக் கொண்டு சென்றிருக்கிறார். அதேசமயம், குழந்தைகளின் பாதுகாப்பில் பெற்றோர்கள் காட்ட வேண்டிய அக்கறை, குழந்தைகளுடன் பெற்றோர்கள் வைத்திருக்க வேண்டிய நல்ல தொடர்பு மற்றும் அவர்களின் செயல்பாடுகளைத் தொடர்ந்து கவனிக்க வேண்டிய அவசியம் போன்ற முக்கியமான விஷயங்களையும் இப்படம் எடுத்துரைக்கிறது.
உண்மையில் JohnDoe என்றால் என்ன? இந்த மர்மத்தின் பின்னணியில் இருப்பவர்கள் யார்? அவர்கள் குழந்தைகளைக் கடத்துபவர்களா, கொலை செய்பவர்களா அல்லது இதுவரை நாம் எதிர்பார்க்காத வேறு யாராவது இருக்கிறார்களா? இப்படிப் பல கேள்விகளை எழுப்பும் திரைக்கதை, ஒவ்வொரு முடிச்சாக அவிழ்த்து இறுதியில் எதிர்பாராத கிளைமாக்ஸுடன் முடிவடைகிறது.
மொத்தத்தில், JohnDoe திரைப்படம் வெறும் சஸ்பென்ஸ் த்ரில்லராக மட்டுமல்லாமல், குழந்தைகளின் பாதுகாப்பு குறித்து பெற்றோர்களுக்கும் குழந்தைகளுக்கும் ஒரு முக்கியமான எச்சரிக்கையாகவும் அமைந்துள்ளது. விறுவிறுப்பான விசாரணை, எதிர்பாராத திருப்பங்கள் மற்றும் அழுத்தமான சமூகக் கருத்து என கவனிக்க வேண்டிய ஒரு திரைப்படம்!
Ratings – 4/5
